اكتب لكم من بلادى وراء الشمس , بلاد الفقر والظلم والجهل والفساد , بلادى دائما اتمنى أراها على غير حال , بلادى تعيش فى الظلام حتى ولو اشرقت بها شمس , الفساد فيها كافى ليحجب عنها اى ضوء ..
بلادى فى اكثر من 6 عقود حاولت الانتفاض والثورة ولكن الفقر والفساد اللى انتشر فيها اضعفها وانهك شعبها فيكون الفشل هو نهاية كل محاولة , الفقر والاستعباد كانوا بقوة تكفى لانهاكهم وابعادهم عن محاولاتهم بسهولة , هل تعرف ان بعد 60 سنه من المحاولات الغير ناجحه ظهر بصيص من الضوء اضاء الامل فى القلوب والابداع فى العقول بعد سنوات من الفساد و الانتهازية ...
فى بلادى السلطة قوية حتى ولو اخطأت واضطرت لتغير الواجهة فقط فهي تعرف بعد كل السنوات الطويلة الماضية كيف تقتل ثورة !!
فقط أنشر الفوضى فى كل مكان وأتهم الثوار , انشر الرعب و البلطجه , خلى الرعب فى قلوبهم دايماً , خليهم يحسوا قد ايه محتاجين لك ولقوتك عشان تسيطر على الفساد , ولو ماستجابوش انشر الفوضى اكتر , اهجم على مستشفيات ومدارس واطفال , اقتل الشباب العزل خليهم يتأكدوا ان البلد على حافة الهاوية ولو ماخضعوش لحكمك البلد هاتضيع ..
استخدم وسائل الاعلام لتحدث الشعب عن الحالة السيئة الى وصلت ليها البلاد وعن تلك الفئات المندسة التى تتبع دول اجنبية لتبث الفوضى من اجل اسقاط الدولة وتأكد ان من ترديد العبارات التى تؤكد ان البلاد فى خطر : البلد بتولع , احنا بنضيع , بننهار , البلد بتفلس , المظاهرات غلط , المطالب دى فئوية , مصر مش ميدان التحرير , وماتنساش تحرض الشعب ضد الشعب ..
وهايمر الوقت , لاتقلق او تيأس هايستجيب ليك ناس كتير وهايبتدوا يأيدوك ويرجعوا سلبيين , هايهاجموا اى حد يهاجمك ويكرروا كلامك وعنيهم مغمضين : ايه اللى نزلهم التحرير؟! , لابسه عباية بكباسين ليه ؟! , انتوا خربتوا البلد , ادوا الحكومة فرصة , المظاهرات حرام !!
وزى مافى مظاهرات ضدك اصنع مظاهرات مصطنعه تؤيدك , وعندما تخطئ اخرج ابواقك لتتحدث فى كل مكان عن مجموعة من المخربين تهاجم مبنى حكومى وقوات الامن تتصد لهم وانهم مش ثوار دول بلطجيه , التشتيت مطلوب جداً عشان الهدف الاساسى يضيع ويفضل حاجه واحده : دول ثوار ولا بلطجية , والخرطوش مين اللى خرطشوا ؟!!
ومن استعداداتك الرائعه للمواقف المشابهة انك متفق تماماً مع بعض الفصائل الغير سياسية اللى وقت اللزوم بتبقى سياسية ..
هما ناس بيلبسوا جلاليب ومربيين دقونهم بما لا يخالف شرع الله , وبيأيدوك وبيهاجموا اى حد ضدك حتى ولو انت المخطئ , بقى فى احلى من كده !!
يهاجموا اللى يهاجمك فى البرلمان ويطالبوا باقامة الحد عليه , ويتهموا شخص تانى بالخيانه والعمالة ويطالبوا باعدامه دون ادله اصلا وطبعاً ده لايخالف شرع الله , و لجهل الناس بدينهم ودنياهم بيقدروا يسيطروا عليهم بابتسامه لطيفة مصطنعة + شوية كلام معسول على أيتين و كام حديث يفسرهم غلط .
يقول ان الثورة حرام وبعدين يلتف عليها ويؤكد انه اول من دعى ليها من سنييين بس محدش خد بالوا !!
استغل كل فرصة امامك للانتقام و التشوية , لكن أحذر لما يتملكك الشعور بأنك نجحت فى القضاء على الثورة , هناك مجموعات صغيره انت لاتهتم لامرها زى اللى قبلك , تصنع الزخم الثورى من جديد وتحشد الغضب فى الصدور وتستعد قريباً للقضاء عليك وده هيكون تحت مسمى "استمرارية الثورة"..
انت تنتج سيناريو قديم , وتمشى على خطوات من سبقك , لكن الصمود سلاح لايقهر ...
كلام جميل واسلوب متناسق واتفق معاك فى اشياء كثيرة واختلف فى اشياء كثيرة الأتهمات والتشكيك فى نيه الأشخاص والأحزاب حتى ولو اختلافنا فى وجهات النظر لا يكون بهذا الشكل والله اعلم بما فى الصدور والنوايا وهرجع وقول المصلحه العليا لبلدنا كلنا مصريين وربنا يصلح حال البلد يارب يا اسلام واكيد انت فهمنى بس جامد يا لوكا
ردحذف