القوى السياسية بين الثورية و الادعاء

نواجه الان مرحلة جديده فى ثورتنا الغالية التى ندفع من اجلها حتى الان المزيد من الدماء والتضحيات ..

من قبل الثورة والقوى سياسية عموماً عندها خلل كبير فى التواصل بينهم , وده اللى كان فرصة ذهبيه لامن الدولة انه يخترقها ويتوغل بينها ويشعل الخلافات , والاغرب ان القوى دى بعد الثورة ماعزلتش الاعضاء المخبرين اللى كانوا عارفين ومتأكدين 100% انهم مخبرين مثل حركة 6 ابريل اللى انا كنت عضو نشط فيها حتى تاريخ 11 فبراير 2011 , 6 ابريل لم تعزل اعضائها المندسين , رغم الخلافات اللى اشتغلت وانتهت بانقسام الحركه لجبهتين ..

كان عندنا مشكلة فى التواصل مع الشارع المصرى وكان اقصى تواصل بيننا و بين الشارع "منشورات-مسيرات" وطبعاً الحال لم يختلف كثيراً قبل الثوره عن بعدها هى هى نفس السلبية واللامبالاه وعدم الاكتراث باللى بنحاول نوصلة للناس , وكانت مواقع التواصل الاجتماعى فيس بوك و تويتر تشبه ساحة الحرب بين اعضاء حزب او حركة سياسية ما و اخرى والقاء التهم بينهم  , شئ مقزز .

كانت الامور تصل ان حركة 6 ابريل قبل الثوره بتتهم بالحصول على تمويل من الاعلام والصحف الحكومية , لا ومش بس ده .. كمان من بعض القوى السياسية منهم ناس كانت بتأكدلى ان معاها دليل على ان 6 ابريل خدت تمويل ولما اطلب اشوف الدليل طبعاً الف حجه وحجه للخروج من الموقف ..

وكمان اللى يزود اصرارك انك تكشف حقارة اغلب القوى السياسية لما تلاقى واحد منهم على قناة فضائية بيروي لنا كيف ناضل وكيف ساعد على قيام الثورة وكيف انه كان من اهم اسباب نجاح الثوره وكيف وكيف وكيف , ومفيش وفى وشه ولا جسمه خرطوشة واحده !! , واللى عمل كل ده حقيقى بيتسول العلاج او استشهد و ادفن واهله مصرفوش تعويضة اللى مال الدنيا كله مايعوضوش !!

جائت الثورة والتى اعترف وانا بكامل قواي العقلية ان اسباب قيامها  تعرض الشعب للظلم على يد الداخلية والتعذيب فتم شحنه حتى انفجر , القوى السياسية فقط ساعدت على تنظيم ايام الثوره 25 و 28 يناير حتى 28 يناير عدد كبير من النشطاء عادوا الى المراكز الحقوقية والى منازلهم قبل انتهاء يوم 28 يناير وأكتفوا بالمشاهده , يعنى نسبة كبيره من اللى كان بيتعمل قبل الثوره ماكانش بيأثر فى الشارع ولا كان بيتحس بيه ..

ونجحت الثورة وطبعاً يتباهى كل فرد منهم بما كان يفعله قبل الثورة من نضال و و و, وانا لما اشاهد كتابات بعضهم اتذكر قبل الثوره جلوسهم اليوم بأكمله على مقهى بوسط البلد دون حراك اصلاً ويكتفوا بمهاجمة او بالسخريه من مايقوم به الاخرون , بعد الثوره ازدادوا غرور وعظمة بأنفسهم .

ولما  تعرض قرابة ال 15 الف مصرى للمحاكمات العسكرية واعتقلوا فى سجون العسكر .. كان الاتى :

الحرية لاسماء محفوظ , طب فى واحد اسمه فلان الفلانى بردوا لسه مقبوض عليه ومظلوم و .. ياراجل كبر مخك !!

الحرية للؤى نجاتى , طب ده بردوا لسه فى واحد مقبوض عليه ظلم وخد 3 سنين عشان سرق يأكل ولاده لانه مش لاقى شغل من بعد الثورة .. ياراجل كبر مخك!!

الحرية لمايكل نبيل دى قضية رأى وفكر ,  رأى وفكر ايه ياشباب ده باع دم الشهدا فى فلسطين وكمان احنا وصل 15 الف مصرى مظلوم بمحاكمات عسكرية ظالمة وماعملوش حاجه .. بردوا كبر مخك !!

وعلاء عبد الفتاح و  و الخ الخ الخ 

من الاخر اصل ال 15 الف دول مش مشهورين مالهمش ضهر , ناس غلابةوعلى قد حالهم بس حلموا حلم كبير عليهم مش بيظهروا فى الميديا ومعندوش كام الف على تويتر وى اكاونت على الفيس بوك , مش العسكر اللى ظلمهم ده انتوا بسكوتكوا اللى بتظلموهم كل يوم 1000 مره ...

فاكرين الولد ده ؟! :

ده الولد اللى اتقال انه هو وائل غنيم لحظة القبض عليه , الدنيا كلها اتقلبت  ..

وبعد تكذيب الفيديو و ان ده مش وائل .. 

محدش فكر يسأل ده مين ؟ وايه كان مصيره ؟ هل هو عايش ولا ميت مسجون ولا حر ؟!!

للاسف اغلب القوى السياسية فى مصر اساءت  للسياسة لتتحول الى لعبة مصالح حقيره ..
 هؤلاء لن يستطيعوا اسقاط تهمة اسقاط الدولة عنهم لانهم بكل بساطه ليس لديهم اى خبره سياسية تكفيهم لمواجهة تلك الاتهامات رغم حسب قولهم انهم تعرضوا لمثل تلك الظروف قبل الثوره . والدليل على عدم وجود خبر للتعامل ايضاً هو ان اقل سيناريو للانقلاب على الثوره نجح فى مصر وماقدروش يتصدوله , ولسه بيهاجموا بعض ..

فى التوقيت اللى ركبت قوى اخرى فيه على الثوره ووصلت للبرلمان كل مافعلناه هو السخريه منهم  ..

ولما تم ترحيل المسيحيين من العامرية فى الاسكندرية على يد بعض المتطرفين لم يحرك احداً منهم ساكناً واكتفى البعض بتنظيم مسيره بالقاهره على ماحدث لاقباط بالاسكندرية !! , هل يشعروا بالخوف من بطش المتطرفين ؟!

الفاعلية الوحيدة الناجحة من تاريخ 11 فبراير 2011 حتى الان هى "عسكر كاذبون" ونجحت فقط لانها خرجت من نطاق التفكير الضيق المحدود فى مسيرات فى وسط البلد واعتصام بميدان التحرير لتبتكر وتتحرك الى جميع انحاء الجمهورية و ان من قام عليها مجموعة من الشباب اللى لسه نقى مالهمش اى مطامع كل اللى عاوزينه حريه ..

هناك من اقتنع بكلامكم المعسول ومات مقتنعاً انكم تسعون للحرية فعلا وستقتصوا له بعد استشهاده ..

دمهم فى رقبتكوا انتوا قبل مايكون فى رقبة مبارك و اعوانه 

اسف على الاطالة

Follow @IslamLuCa