كلها عبارات اتكررت وصف فيها الشباب فقدانهم للامل و الاستسلام بس تعالوا نشوف الاول عندهم حق فى كده ولا لا :
الثورة المصرية اللى قضت اول 18 يوم من عمرها فى ميدان التحرير حضرت 3 مواقع واحد يوم 25 يناير و التانية يوم 28 يناير ويتخللهم بعض المناوشات بين الامن المركزى و الثوار فى شوارع وسط البلد وبعدين يوم 2 فبراير موقعة الجمل , وباقى الايام ؟!
ابداً ناس موجوده فى الميدان وفى استيدجات وفرق بتغنى وبعديين الشعب خلاص اسقط النظام وبيتك بيتك !!
ابداً ناس موجوده فى الميدان وفى استيدجات وفرق بتغنى وبعديين الشعب خلاص اسقط النظام وبيتك بيتك !!
واللى كانوا كنب نزلوا احتفلوا معانا !! مش بقلل خالص من اللى عملناه فى الايام دى انا عشت نفس القلق والتعب و الارهاق و المرمطه , انا اقصد بس ان احنا مات مننا ناس و اتصاب مننا كتيير , بس ماضحيناش كفاية ..
وانتكسنا من جديد واضحك ع الناس بـ ان مصر الجديده وصلت والحياة بقى لونها بمبى , وشكراً !!
طبعاً ده كان شوط اول فى الثورة اللى لسه ماخلصتش واخفاقاتنا احنا اللى خليتها تضعف وخلت العسكر يسيطروا اكتر ويفهمونا كويس ويلعبوا علينا كمان , استدعونا لحوارات و اجتماعات وبعدين ظهر ان فى ارضيه مشتركة بينهم و بين الاخوان , وغلطنا ان كل ماكان يحصل حاجه نقول يلا ع التحرير مليونية , وخسفنا بكلمة "مليونية" الارض وتأثيرها راح ..
عارفين احنا نجحنا بس لما خرجنا من ميدان التحرير فى اخر 2011 بعد اقتراب مرور عام كامل على بداية الثورة وده كان بحملة كاذبون وحملات مشابهة ليها تحمل نفس الفكره وهى توعية الناس لاسقاط العسكر , ولما شوطنا الكورة ودخلت جول , ناس كتير اتغرت بالجول ده وماخدوش بالهم من اللى خد الكورة وجرى بيها ودخل فينا 20 جووول ..
وبعد جول واحد كله ساب الملعب وجرى ع الكاميرات ويحكى قد ايه لولاه ماكانش الجول ده جه !! , فهمتوا ليه البلد بتروح !!
الثورة ماكملتش بسبب اخطائنا احنا مش زى مابنعلش على شماعة ان الشعب ده ساكت وخضوع وبيحب الذل وانه مايستحقش الحرية !!
خلينا نبطل نعلق اخطائنا على الشعب ونفكر فى خطوات جديه نتحرك بيها قدام ونرجع ثقة الناس فينا اللى خسرناها بسبب كل من هب ودب يتكلم باسم الثورة !! (مزايده) -طبعاَ زى ماقولت قبل كده انى انسان مزايد بالفطره =))-
كمان فى ناس تانية شغاله ميلودرامية : البلد دى مالهاش مستقبل وانا مسافر ومش راجع الا لما تبقى كويسة !!
يعنى انت تسيب اهل بيتك من غير ماحد يحميهم ويراعيهم ويدافع عنهم ؟ :)
وانتى تسيبى والدتك عيانه ومريضة ف بيتها وتروحى بعيد عنها ومالهاش حد يرعاها غيرك ؟
بص ع الامل فى البنت اللى عمرها مايعديش 16 سنة وبقت مخترعة ومعاها ماجيستير
وع اللى عمره مايزيد عن 13 سنه وعبقرى فى الرياضيات وبيدرس لطلبة الجامعات
بص عليا وعليك , عملنا اللى فى قرون طويلة حاولوا يعملوه وفشلوا , احنا خرجنا عن المألوف فالطبيعى اننا نترفض ونتهاجم و كمان أعذر ناس بقالها مئات السنين عايشة ف ظلم و قهر , استسلمت للواقع ..
لا خلينا نصلح اخطائنا ونكمل , وخلينا نصنع المستقبل للى جاى مش لينا , لان لو كل واحد فينا مستنى الثوره تحققلوا اللى هو عايزه هاييئس بسرعة ومش هايكمل ..
انسى اللى عندهم 70 و 80 و 90 سنة , بص على نفسك و على زميلك وعلى قريبك الصغير اللى دماغوا توزن بلد , كل دول عمرهم ماهايقبلوا اننا نرجع للى كنا فيه , تخيل حال البلد بيهم بعد 30 سنه هاتكون شكلها ايه :) ؟
انا متفائل وانت ؟
ليست هناك تعليقات:
إرسال تعليق